ADIRÊ VORE "OTEL"
Nusret Karul
ADIRÊ VORE "OTEL"
Ez vızêri rakewto, mı yew hewn di, ez wazeno kı ayê hewnê xo şıma ri vacıro.
"Yew veng ame goşunê mı, goşê mı çelqıziyay u vaciyayne "Ma veşenime." Mı vazda, heta emroz mı nêdi bi, sey enê vazdayışê xo, ez şıyêne, nêşıyêne, ez nêresayne uca u ez ey adıri hewna bikero. Areqo adırın rıyê mı ra ameyne savaşı, zerrey mı dı kilay adıri veşayne, çımunê mı ra laserê nisane ameyne war. Vengê adıri nêvınderd, reyna va:
"Pıt esto, pıt
Pıtê mı ho veşeno, pıt." Maye hındi xora vêrti bi, ganê xo ca verda bı, vatêne, "wa ez bımıra, hama wa pıtê mı weşiya xo bıramo. O pıt her çi ra bêxebere veşa, bi zey wele.
A visti dest u payê mı kewtê têmiyan, laserê nisane bıy zêdey, kıla adıri şı bıy, resay bıy asmên, vengê maye resayne arş u ala. Ez şıyêne nezdi, ey veng goşê mı dırnay. Ez çı hende bışıyêne, hama ez nêresayne adıri hewna kero. Ters veri dı cigerê mı binê payun dı geyrayne."
Mı çimê xo akerdi ke, eke zerrey otel dı 79 teney merdumi merdi zey Madımaq u gani gani veşay zerrey kılay adı dı u enê merduman cehnem ena dı.
Bı nımac [şewdır], mı televizyon akerd, porsuk be porsuk mikrofon kerd xo dest: o vano, "ez sucdar niyo" o bın vano: "ez sucdar niyo", şono kanala bını, vano: "sucê ay binio", o bın reyna vano: "sucê ay binio, wa bero, ma mışewre bikerime, kam sucdaro, wa gurey xo ca verdo"
Xeyrê xo, hele vacên, şıma isanetey kamca dı xo vira kerda, şermo...
İnan dı ne şerm esto
Ne inan dı isanetey esta
Ne pıt esto
Ne zi weşiye esta
