Fotomodeli Vêyşan Manenê!

Almanya'de mecmua céniya u rindekiye Brigitte, ebe slogané "Ohne Models" (Bê Modela) kampanyayé fiştere rae. Brigitte êndi fotomodelanê profesyonalade nêxebetina; nae ra tepya pelanê xo ebe modelanê amatora xemelnena. Hêni aseno ke kampanya Brigitte endustriyê modi nıkara zaf tersno. Taê koreografê modi pışti danê na kampanya, zafêriyê xo ki lom û gazına kenê...

Mecmua Brigite Almanya'de derheqê cêniya, rındekiye, mode, weşiye, çê û stilide, mecmuade gırs û naskerdiya. Gorê mecmuanê modanê welatanê bina, Brigitte taina gıran û wayirê sênciya. Brigitte jû kampanya fiştere rae; êndi naera tepya Brigitte fotomodelanê profesyonala de nêxebetina. Hurêndiya dinade, pelanê xo ebe modelanê amatora xemelnena. Sermiyanê Brigitte seba na kampanya ra niya vanê: "Dınya dormê ma vuriya, cêni vuriyê; teba nina mode ki êndi vuriyo. Êndi waxtê heqiqetiyo; emro rojane ra, ebe cêniyanê heqiqiya, mode û rındekiyê de heqiqiye." Heqeser, nê vatenê Brigitte ere goşê insani zaf weş ênê; heqeteni ki modi nê seranê pêênade serhev cüzi ra veto. Yanê modi şilmaqêde zexme heqkerda!.

Feqet onciya insan xo şûfe ra nêxelesneno ra; Tı vajê Brigitte heqeten niya wazena, ya no onciya hilê de rotişi yo? Hona kıfş nêbeno. Ekhe Brigitte ma nêxapno, ebe na kampanya xo modede rêçê de newiye kenara. Se? Modê dınya hatani nıka taê ideala û standarda sero vaşto ra. Kerdoğanê modi ideal cêniye û ideal cûyamêrd şanıto verê çımanê insana û waşto kke herkes zê nê insananê ideala xo têrapişo; zê dina non buro, zê dina qesêbıkero, ê şonê koti o ki şoro uja...

Mode û endustri têkalekede şonê: Zê endustri, mode ki malo standart vejeno (gegane ki qesta dirê ferqa keno werte). Çıke malo standart hem rehet êno vıraştene, hemi ki kara xo zafa. Feqet nê standardi, ferqa wertê insana serê hardara danêwe!

Heqeteni ki şarê dınya roj bı roj şonêre jûbini. Êndi Paris'de, Pekin'de, Moskova'de, İstemol'de, Dêsım û Varto'de insani zê jûbini xo pişenê têra! Êndi dewanê made domani ebe "bluejean"a şonê dawari ver. Nê pêro kerdenê modiyê. Mode zaf estetik û zaf bı ferqe aseno, hema hêni niyo. Mode neqşanê hazar sera, xemelyayêna hazar sera gorê kêfê xo keno têwerte, qaşo maşo cıra çiyêde newe vejeno; feqet no çiyo newo ke vejino, zafêri bê tam û lezeto, xora wertê dirê serade xovira beno. Ma kampanya Brigitte ser hondê xori şime, êndi se vajime; heq biyaro werê wa na kampanya şoro sere, wa herkesirê bıbo emsalêde newe.