Xıdır Eren: EZ ÇI ZON, EZ NÊZON!

Xıdır EREN

Mawa mın’a rametiye ebe çêneka xo’a dı serri’ya 37-38ine de new asmi koun, bırrun, gabanun be mığaran de çerexiya, fındeta. Rocê, Koê Mari de menser mendê. Ebe taê isanan’a, halê’a naca ra xeleşiyê, Koê Heyder Babay ra çağıl ro amê war Deşta Khurêsun. Aca ro dewa xo Burnağe ser vaz dê. Çıko ke nafa ki qersunê aşira i caun varê pıro. Xo teng eştê bukê Toroşiye. Mulxıtê xo mawa mı be çêna xo’a Burnağe de kerdê jü mereke, be xo ebe qelfe’a vaz do bırrê Qeredeşiye. Eskeri dewa Qısley ra milisê sano xo ver, kütê zerrê Burnağe. Çêy sae kerdê. Kes ke nêdiyo, milişi vato, “Mı çêna Hesen Ağaê Weli Ağay xo çım’a diye. A naca de caê de darda we. Merekun ki sae kerime.” Mereka Çaqi de mawa mı vinenê. Na mesela daêna derg mekeri...

Ma ke mawa mı ra çiyê bıpersênê, mawa mı; “EZ ÇI ZON, EZ NÊZON!” vatınê. “Ne khıle çae nêzanena. Tı tey nêbiyay? Tı ki aca de biyay. Ma çı ra nêzanena?” Ae, ancia vatınê; “Ne bıra bıra ez qedaê sıma bicêri. EZ ÇI ZON, EZ NÊZON!”

Nıka na dormê ma de hendaê çi beno. Mesela ma biya mesela mawa mı. Ma ÇI ZANİME, MA NÊZANİME!

Rocan ra jü rocê, İdlib ra HTŞ vecino rae, 72 saetan de yeno, reseno Şam. Waxto ke HTŞ Şam küyo, rae ra Esedi be HTŞ ver kenê jübini. Belkia jübini rê dest ki sanenê ra; ma EZ ÇI ZON, EZ NÊZON!.. Dıma, çenda u çend serrio ke TC kerdê weyi, ardê pêser; cı rê vanê SMO (sıfte ÖSO), ebe ninan ra dano SDG ro. Veroc ra İsrail küno herdê Suriya. Vano, “sıma nêbo Durziyan rê dest wedarê. Çıla sıma sıleynon!..” Temsilkarê TC dugelun pêroine ra ravêr vezenê, Camiya Emewi de nemac kenê. Kınc kolê Colani vurnenê. Vanê, “tı nêbo ni namey reyna biarê zonê xo ser. Tı henda Hemeda.”

Qey nia kenê? Ma, EZ ÇI ZON, EZ NÊZON!

Waxtê ra tepia sêr kena ke dugeli zêdêri kütê qore, Hemedê xo de mobet derê. Çı qesey kenê, se vanê; Hemed qey İsrail rê vengê xo nêveceno? Ancia: EZ NÊZON. Ezo bêkes ÇI ZON! TC roca im u cümi tersun dano SDG. Be na’wa nêfındeno, APOy fino reqes. Heyeti yenê, heyeti sonê. Mektubi yenê, mektubi sonê. AP vano, mordemê mı pêro çheke ca verderê, xo bertel kerê. Henda gun gunê çheke niyo. Gun gunê konfederasyoni, federasyoni niyo. Endera gunê kulturalizmi niyo. Ma çıko? Ezo bêkes koti ra bızani. EZ ÇI ZON. EZ NÊZON!

Naca de roci nia vêrenê ra. Ni rocan de sêr kena ke Suriya ra vengi benê berc, “Elewiyê xoji, ma bıpiyerê; mao yenime!” Ni vengi dıme ra camiya Emewi ra jüyê do HTŞıci destê jü’ya destê baqanê sereskeri gureto pê, destê bini de sımsêr. Qireno, sımsêri hawa de saneno ra, vano; “Ey Elewi, ey Elewiyo bêdin u iman! Nafa sıma be ni sımsêri’a kenime lete u lete!”

Dıma sêr kenime ke qolê HTŞ be destdaranê xo küte mılkê Elewiyu, tek be tek isanun dane arê. Kami ke cênê, benê, reyna kes peyser nêno. Yê tainun cendegê xo kişta raan de vecinê. Tainun dane arê, herd ro ğız kenê, zê kutıkun finê lawais; heqaret kenê; danê pıro; tainun vera çımun nanê pa, kisenê! Dina kherr u lala!!! Verba dina kherr u lale nafa ki be çhekanê gıranan’a künê Tartus, Homs, Hama, Safta be Lezqiya... Hazaran ra isanun qır kenê. Adır finê çêun. Ninun ki be xo cênê kamera, kenê vıla. Zê verê hotela Madımaqi keyf u kelebut kenê!

Ma, bado se beno? Bado ABD be taê dugelan’a melmeketê de Erebi de yenê têare. Xo miyan de muzıl kenê. Ebe helqoptera ABDy’a Mazlum Kobani (naê ra tepia Ferat Abdi) cênê, benê Şam, Mazlumê xo be Hemedê xo anê têare, vanê; “Kutkine mekerê, (belkia) bêrê werê. ‘Hana heşt qesun sero amayme werê’ vacêre, neşir kerê. Ni qesun miyan de qesa SEŞİNE zaf mohima. A mutqal tey bıbo. Hemed gıravatê xo nêbo xo virra kerê. Yamu, yamu!” Tı vace, no çıko, çıbılao? Ulay, EZ ÇI ZON, EZ NÊZON!

Ma kam ZANENO?

Ae ki EZ NÊZON, EZ ÇI ZON!

Bızanê, bızanê; kami senê dame na ro, senê kay gureto de, helbet i zanenê...

Heqa mawa mı est biya. Bêkesa mı koti ra bızano. Kami ke sano pê ardo ra, o zaneno!

11.03.2025