Hawaiide Ajne, Koanê Alpade Ğıjıke

Vanê ke, vêrê insani ke bi mırd, nafa ki qelbê insani beno vêyşan. Taê insani qoje emrê xo welatê xode viyarnenêra, taê insani ki ca be ca fetelinê hatani ke merdi. Çı beno bıbo, fetelyayene çiyê de rında. Şo dınyara bıfeteliye, koti pê qayil biya emrê xo uja raviyarne; eke ebe caê qayil nêbiya, onciya racêre bê welatê xo. Bilasebe nêvanê "dınya êndi biya qıj"; heqeteni ki, êndi insan her ca raştê herkesi beno. İnsani, şari, zoni, zagoni pêro kewtê têmya. Turizım û fetelyayenê hama hama ke sindori werte ra dardê we. Lêê hondê xırabanê waxtê modernide, ma vajime ke, na ki kara dêwa. Axri insan merex keno, şarê ma nê modê fetelyayênera çıqa nasibê xo cêno? Gorê vinıtene û zanıtena mı, made êê ke imkanê xo estê, hondê nêfetelinê; wisari ênê dewe, payizi şonê suke. Ez nê niyanênarê çiyê salıxdi; bêrê emser nınga heşi bışkınê, taê dınyara bıfeteliyê. Vırêndiye şorê Hawaii'de ajne bıkerê, pêyjo racêrê bêrê Awrupa, nafa ki şorê Koanê Alpa'de xo ğıjkerê. Keso ke ajnê û ğıjıke nêzano, wa merox nêkero, hurdimina caade ki bêhemd qursi estê. Hondê ke şıma taê qemişê pera bênê, êndi her caê dınya bınê nınganê şımadero...

İnsan zê qezenc kerdene, gere xerc kerdene ki bızano. İnsan gere xo layiqê çiyanê rında bıvino. İnsano ke xo herçira dûri cêno, herçi xo çımde zaf keno gırs, ebe destê xo dormê xo diwar onceno. Axriya xebati û pere qezenc kerdene çina; eke imkana to esta, serede dolımê, hira hira dınyara bıfeteliye...

 Hawaii Oqyanusê Pasifik'de, dûşte Kaliforniya kunê, nıfısê xo qasê 1.200.000i esto

Hawaii eyaletê Ameriqaê 50ino û dûştê Kaliforniya kuno. Her caê dınyara tiyarê şonê. Awrûpa û Tırkiyara ki her waxtê serede turê Hawaii vazenêra. Turê de Hawaii Awrupa'ra nezdiyê 2500 Euro, Turkiya'ra nezdiyê 2000$ gırê dana. Mendene, şiyayene-amaêne, roj dı cemi werdene zerê nê fiyatadera. Waxtê şiyayêno rınd wısaro.

Koê Alpi Awrupa wertênederê, bêrzênya xo 4810 metroya, caê sporanê zımıstanaê

Koê Alpi Awrupa wertênederê. Zafêriyê xo Austırya û İsfiçra'dero. Berzênya xo 4810 metroya. Koaê Alpi dınyade caê sporanê zımıstanaê. Tırkiya'ra zımıstani her hefte turê Koanê Alpa vazenêra. Welatanê Awrupa'ra amaene taina reheta. Tırkiya'ra turê de Koanê Alpa nezdiyê 1500 Euro gırêdana. Şiyayene-amaêne, mendene, 2 cemi werdene zerê fiyatidera.