Mehmet Mükan: Sokrates Ve Televê Ho Ra
Sokrates Ve Televê Ho Ra Aê ke jêderê, qerarê dine qewıl kerdene ke demokrasiya, adalet ki nu niyo? Mesela cao ke se mordem rey erzeno, mordem ke qerarê phoncas u zu tenu qewıl kero nu dorğiyo, ya ki qerarê çewres u new tenu qewıl kero dorğiyo?
Nuştoği
0
97
... Rozê oncia Sokrates ve televunê ho ra ke qesey kenê, zu televê hu cı ra pers keno, vano;
- "Aê ke jêderê qerarê, dine qewıl kerdene ke demokrasiya, adalet ki nu niyo? Mesela, cao ke se mordem rey erzeno, mordem ke qerarê phoncas u zu tene qewıl kero, nu dorğiyo, ya ki qerarê çewres u new tenu qewıl kero, dorğiyo? Qerarê phoncas u zu tene qewıl kerdene daina dorğiya, çıke mordemê jêdey mordemunê senıku ra daina senık ğeletiye kenê. Hama tı verva demokrasiye vejina, nu çiyo de dorği ki niyo, adalet ki niyo."
Na qeşi serra Sokrates jê her waxti eve usılê pers u cüavi cı ra pers keno;
- "Ala vaze" vano, "Alim biyaene zora, ya ki cail biyaene zora?"
Televe;
- "Tavi ke alim biyaene zora. Mordem gune zof bıwano, pers kero, bıqefeliyo ke alim vo, hama cail biyaene rê ni lozım niyê."
Sokrates;
- "Rınd, ma ala vaze, cailê zu mıleti zofiê, ya ki alimê hu zofiê?"
Televe;
- "Tavi ke cailê hu daina zofiê."
Sokrates;
- "Rınd, ala oncia vaze, zu gemiye de ke se mordem bıbo, gemiye yelkenunê hu koti, çıturi, kamıji heti ser rakero, naynu qaptanê a gemiye zono, ya ki u se mordem rınd zono?
Televe;
- "İ se mordemi ra ke heqa dengızcêni de malumatê keşi çino, tavi ke en rınd qaptan zono."
Sokrates;
- "Rınd, eke henio, şikime vajime ke her kes her çi de nêşkino qerar bıdo. Mordem gunê çiyo ke zoneno, ey de qerar bıdo..."
Televe;
- "Tavi ke henio."
Sokrates;
- "Rınd, ala oncia vaze, hata mordem nêzono ke kam senê çi de wairê malumatio, şikino ke vazo, 'felan mordemi daina sılxetiê, qerarê dine daina dorğiyo'? Hem tu ki qewıl kerd ke cailê zu mıleti alimunê i mıleti ra daina jêderê."
nuştoğ: Mehmet Mükan
