Kes Çino

Kes Çino!

Sonde veẓiyane tever, qe kes çino. Asmêno ḳewe de astarey estê, ṙiyê hardi de ki ẓü ezane. Kutıḳi ki çinê. Ez teynarane. Nu mılet şiyo koti, çıra qe kes nêaseno, se bi ninu rê? Ṙaşti çı bi ke, qe kes caê nêaseno?
Soqaqu de fetelün, nat u dotê mı de çêy estê, çıla çêu vêsena, hama zeṙê çêu de kes çino. Çêy ṭalê. Ne cêni, ne cüamêrdi, ne ki domani estê. 
Vengê ki çino. Nêzanon, dina biya lal u ḳeṙe, nêzanon mordemi biyê lal u ḳeṙi, nêzanon ke ez biyane lal u ḳeṙe. 
Hele vınde, se beno? Xorê gıran gıran şiyane. Şiyane, ẓü soqaqo bin de veẓiyane. Nu soqaq tenêna tariyo, çıleyê ke vêsenê, zaf ṙoşti nêdanê, hama mordem ṙaa xo vineno. Ẓü veng ama, ez hini zanon çiyê verê çımanê mı ra vêrd ra, şi. Zaf hervi şi, mı qe ṭawa nêdi. 
Oncia xorê gıran gıran şiyane. Şiyane, ẓü soqaqo bin de veẓiyane. Nu soqaq tıng u tariyo, çım çımi nêvineno, mız u dumano. Vengi yenê, sıxletiye esta, nêzanon qesey kenê, nêzanon huyinê, nêzanon berbenê, nêzanon zırçenê, nu senê qal u qıro? Kutıḳ wayirê xo nas nêkeno. Werte ra vêrdane ra, şiyane. Tenê ke şiyane, çengê de ẓü vengo berz heşiyane pê. No senê vengo, nia? Hini berzo ke mordemi keno ḳeṙ. Hetê vengi ser şiyane, tari de çiyê lewino, nêzanon çêneḳa, nêzanon lazeḳo, ẓü domano. Hini vengo berz ra “bao” vano, zırçeno “daê” vano, berbeno ke cigera mordemi bena letiye.
O doman çıra hini berbeno, çıra qe kes nêhesneno, çıra qe kes lewe de çino? Ez oncia qe ṭawa nêzanon.