Mustafa Tigrek: Ez do nêwana!

Mustafa Tigrek: Ez do nêwana!
çıme: ChatGPT
Mustafa Tigrek: Ez do nêwana!

Ez do nêwana!

 

Mustafa Tigrek, 16.12.2023

 

Ez çahar panc serrı bıya. Bırayê mı, mı ra pil bı. O şıyê mekteb.

Waya mı tûtık bi. A qundax de bi. Mı keyey vero kay kerdê. Vengê maya mı ame:

 

-        Kavırê mı. Bê zerre, çınayê xo bıvırrnı. Ez û tı, ma do piya şırê sûke.

 

Mı va:

-        Waya mı do zi biro?

-        Nê. Aya rakewna. Ma do şırê, birê.

-        Bırayê mı do zi biro?

-        Nê. O do zi keye de bımano. O do ay bıpawo. Hım zi karê ey’ê keyey  esto. O do inan vırazo.

-        Temam. Ma şırê.

-        Sıfte çınayê xo bıvırrnı. Bahdo ma do şırê.

-        Çınayê mı weşo.

-        Tı biyê zey qereçiyan. Eke qereçi to bıvınê, ê do vajê, no lajekê mayo.  A pırêna xo biya, ez bıvırrna. Zerre de çınayê lheymıni estê. Ninan zi çekı inan ser.

-        Ma do sûk de awa wışney zi bışımê?

-        E, ma do bışımê. Nıka şo, sewlê xo pay bıkı. Ma bıvıjyê.

 

Maya mı veng da zerre, bırayê mı ra va:

-        Xalê to do biro. O do selêke hakê biyaro, inan berı mıtbaxe. Mıtbaxe de zi hakê estê. Ninan û inan pêmıyan mekı. Ekı xalê to do biyaro, ma do inan meşte şewra bûrê. Ninan ra zi eza şıma rê kılencay vıraza.

 

Bırayê mı veng nêkerd.

 

-        Eza kami rê vana? İnan sel ra mevejı. Nê kı keye de estê, ninan zi miyanê sele mekı. Ê haki dew ra yenê. Dewıji inan dew ra anê. Nê kı keye de, mı nê sûke ra gıroti. Wa pêmiyan nêbo.

 

Zerre ra vengo berz ame…

 

-        Mı fa’hm kerd. Eza (do) ninan û inan pêmıiyan nêkera!

 

Maya mı çewt bi û şımıka xo lınga xo ra vetı. Şi verê berdê wedey. Şımıka xo şanê û va:

-        Ez vana, qey to bêriya nay kerdo. Vengê xo mı rê berz mekı! Televizyonê zi meakı! Waya to rakewna. Ay aya mekı. Ekı a aya bena, zerre dı şıtê ay esto, thayn germ bıkı û bıdı ay. Wa şıt serd nêbo. Bê xalê xo, kesi ra zi beri meakı.

 

 

***

Ez û maya xo kewti ray û ma piya şi sûke.

 

Bınê dare de merdımekê ronıştı bı. Verê cı dı sandıqe est bi. Fırçekê şanayê. Waxto kı ez pêrdê xo ra ameya sûke, mı no merdım o waxt zi di. Nê merdımi o waxt zi fırçe şanayê.

 

ey ra boll has kerd. Mı marda xo ra pers kerd:

-        O merdım se keno?

-        O merdım boyaxkero. Sewlan boyax keno.

-        Eza zi boyaxker bıba. Eza zi fırçe bışana.

 

Maya mı hêrs bi û ez anta. Xo pey ra ez guz kerda. Va:

-        Boyaxkerdoğey xo vira bıkı. Tı do bıwanê!

 

***

Ma cayê ra ravêrdê. Mı marda xo ra va:

-        Tıya çendıkı boll meymani ameyê.

Maya mı va:

-        To çırê wına va?

-        Beri vero boll sewli estê.

-        , kavırê mı. Nê sewli, sewlê meymanan niyê. Sewlê nê merdımiê.

-        No merdım ninan hemını keno pay?

-        Nê. O merdım rotoğo. Ninan roşeno.

-        Zerre dı zi sewli estê. İnan zi roşeno?

-        E. İnan zi roşeno.

-        Hım ninan, hım inan roşeno?

-        E, pêrın roşeno.

-        Eza zi rotoğ bıba. Zey nê merdımi, boll sewlê mı zi bıbê.

 

Maya mı hêrs bi û ez anta. Xo pey ra ez guz kerda. Va:

-        Rotoğey xo vira bıkı. Tı do bıwanê!

 

***

Sûke de karê ma qediya. Verê agêriyayışdê keyey jew karê ma mend. Ma do awa wışney bışımê. Maya mı va:

-         Eke tı wazenê, leymûn bışımê.

Mı engışta xo kerdı dergı ew mı awa wışney musnê:

-        Ez ay nêwazena. Ez nay wazena.

 

Mı awa wışney ra qultê şımıtı û list. Mı zıwanê xo çoşmed fekdê xo çarna. Peyra mı va:

-        Eza zi rotoğê awa wışney bıba. Eza her roj awa wışney bışıma.

Maya mı hêrs bı û ez anta. Thayn mendı bı kı mı xo pey ra guz bıkero

Awa wışney rıjyê mı ser. Mı qedıxa xo vırrna erd. Dıma mı xo zi çekerd erd û ez qiryaya:

-        Ezê  nêwana! Mı rê çıçi. Eza nêwana! Eza nêwana!