MERGÊ WEŞEYE

Key ke piyanz bı sür, terrna, cenıke. Fırıngi bırnay u salçe kerd pıro. Fasla kı vızêri kerdi bi miyanê awke, dekerde zerre u sole zi dekerde zerre, şenık zi şeker dekerd zerre va "wa şalçe kı keye dı vıraziya, çaleyay xo bımıra. Verêndı adıro har dı pewt, dıma adır kerd şenık, pewt. Hizara keten rakerd u dı tasi ronay, werte dı zi yew salate piyanzın rona. 

Keşke teyna hela kı piyanz bıqesnayne, bıbermayne...

Werdo germın dekerd zerrey tasan, nano germın da mêrdey.

Mêrdey sarey xo berz nêkerd, nan gırewt, yew lete dırra kerd u eşt fekê xo. Yew kuçık zi werdi ra gırewt. Dıma hizar kaş kerd, serê hizar kerd bın.

Sola werdi şenık bıye, merdumeya mêrdey...

Hêrsi kı zerre dı mendı bı, sole kerde mane, hêrsê xo cênıke ra vet.

Pê kerran, çıwan, nûcıkan eşkiyayne, katanê cênıke bışıkno, hama henday vatey nêeşkiyayne bışıkno. 

Katey rocan ra pey bıyi weş, hama ruhê cênıke hiç nêame xo ser. Her dest ra tersayne, ge hêrsê teberi cenıke ra vetêne, ge xo ra cêr dıyêne, ge xo ri kole, ge xızımkar, ge zi... Kardi bıye, kışiyaye cênıke ya zi cênıki, cênıkê ma, cêniyê ma...

Key kı nêverda sey isani rayêr ra şêrê, zerrey xo dı rayêr ra şıye u peyni dı kewt war. 

Kê kı zerrey xo dı kewti war, uca dı xora kê xenaqiyeni...

Yew rocı waşt kı ena bındestey bıqediyo. Persê "Çınay ra sola enê werdi şenıka, eno pıt çı bermeno" nêwaştêne, nêwaştêne pê enê persan her roc bımıra, quwet tede nêmendı bı.

Yew imza eşte, kıştay boni ra xo tada, ta nêda, tıfıng erziya.

Beno kı cıwiya xo dı, yew çi semendê xo kerdêne cênıke, vengê tıfıngi miyan dı vindi bıye.

"Gırewte, berde, wedarde..."

Roca bıne, rocnaman dı namey cênıke nusiya. Piyo kı zor ra day bı mêrdey, we zi berma, dıma va: "ez poşmano" se ke gunanz xo bıkero sıvık. Darba pile xora piyê xo ra gırewte. Pi hiç destê xo nêkerdêne sarey keyneka xo ro. Camêrdan xora dest u payê cêni şıkiti bi.

Xora yew rocı xo alaqnayne, hama "ya pıtê mı se beni" vatêne. Cam gırewt kerd xo dest, destê xo bırna, şıkıtey cami nêdecna, şıkıtey cani cênıke kerd bi parçe-parçe.

Her kesi yew dest ra ganê cênıke vet. Tımi kerde kole. Sey mendi, xeyalê cênıke, seykur mend her çi, da pı ro, ena dınya ra şıye, ewro zi belkia şoni, cênıkê bıni...

Yew kışiyena, yew kutış wena. Yew ra vani çı gıjıkê to aseno, yew ra zi vani to çı ena fistane pıra gırewta. Ge fıkrê cênıke erziyeno pey beri, ge zi cênıke erziyena pey beri. Ge zi zor ra zewecneni.

Xora pey teyna yew fotraf, fotrafo dırrete, rı nımıte, "axê xo" peyni dı mende ca verda.