Berfekênia Seytani…

Seytani gos na ro ser, severese kuli oncia yena. Wertê polunê xo ra, xo pey de dımê xo de nia da. Dımê xo voz da sari ser. Na kuli gos - kherıkê mı berdê, aqıli sarê mı, sarê mı ra veto, kerdo dımê mı. Son u sodır, peroz u pesewe, pil u qız, lazek - çêneke, mêrık u hermete, kam ke esto, fekê xo kerd we, qalê mı keno, naleti vorneno mı ro.

Besmele oncenê, namê Heqi ra avê namê mı dekernenê. Rınd ke dina pêro mısılmane niya.

Xoze vejino ro camiye, qalê mı keno. Papaz sono kilise, qalê mı keno, Xaxam sono sinagog, qalê mı keno.

Pust puştêni keno, vano, “seytani ez xapıtune. Seyta’ kut bedenê mı.” Jüy burê, jüy raa Heqi de bıderê, vazê, ‘Heq ma tavuyê seytani mekero.’

Kilıtê çêverê xo beno vindi, vanê, ‘mılaketu berd.’ Tı kilıt qına xo dıme berze, kilıt’ê wayir mevejiye, qalê mı bıke.

Cêniy qavu şünê, qav ke dest’a gına waro, şikiya, vanê, “karê seytanio.” Nêvanê, ‘ma dest’a thawa nino’, qalê mı kenê. Kes thawa perre xo ser nênano.

Çhêl u çhukê xo çelesızêni keno, rehet nêvındeno, vanê, “seytani ver lewiyo. Tı vana k… seytan’na gıno waro. Çhêlıkê seytanio. Qına seytani de nêvındeno. Dımê seytanio.”

Caê rê mı sağ nêverdanê, qalê mı kenê.

Sıfre de nisenê ro, pizê xo kenê mırd, halpê xo koto ro, mırd nêbenê, sekerê xo gıno waro, vanê, “ça xonde sona ta, to de mılaketi wenê?”

Sonê Kabe, benê heci, mı sanenê kemeru ver.

Kıtavunê dini de phonc çekuyu ra hirê çekuyu de namê mı vêreno ra. Ez ke namê xo kıtavunê sıma ra boncine, vejine, çekuyê kıtavunê sıma jê pel u puşi yenê war. Ez onci xo seytanên’na nêken, van, ‘pê bıxeceliyê.’

Ser - bınê qeşi vanê, “seyta’ mı qurdi keno.” Ez ke sıma qurdi mekerine, khalıkê sıma Adem hona bınê dara soe de roniştae bi, parşüya hu’ya çewte mışt dêne, vınêne de.

Hard’a petrol vezenê, vanê, “mijia seytania.” A mijia mı ke mebiyêne, sıma çutıri şiyêne asmêni?

Mı meqarnê, heni dano ra mı aste ke, ez namê xo dina ra bıvırnine. Kıtavun’a, kılamu ra, hêkatun u sanıku ra, din u iman ra name oncen, vezen, ala sıma  se kenê? Hurendia mı kam keno pırr? Eke zor kerê, mor kerê, belkia cênu ra çhikê bıperro. Yê ki hona bınê bandıra Ademi ra bese nêkenê bıvejiyê….

Ez bine tavuyê seytani, mı na nuste nusna…

Veli Kişioğlu