PADİŞA ZEY ŞARİ KENO

PADİŞA ZEY ŞARİ KENO 

Yew roce şarê şarıstani yeno pêser, qêrenê vengê xo kenê berz, vanê

"Ne dıwelê ma de edalet, ne zi isanetey menda, isanê ma geste ra mereno, vêşaney ra şono, miyanê gemari ra nan veceno, beno keye de weno",

Reyna vanê;

“Ma enê padişay nêwazenime , ma gani enê padişay bıfinime war”

Padişa pê hesiyeno, wenişeno astorê xo, şono eninan het, vano;

“Zaf vengê xo berz mekerên, eke şıma bıwazê, lerz mı finenê war”

Şarê dıwele ewniyeno (nia dano) yewbinan ra, cı ra pey ewniyeno padişay ra.

Padişa şarê dıwele pêser keno, beno verê jû dole u vano;

"Ena dole şıma ra asena?"

Şarê dıwele;

"Eya, ma ra asena"

Padişa reyna vano;

"Ez ju cıle erzenan zerrey ena dole ser, nêmey şewe şıma bêrê, şıt pırr kerên, key ke şıma dekerd, pırr kerd. Ez padişayey ca verdanan. Hama waxtê ke şıma şıt dekerd ena dole, gani kes kesi nêvêno.”

Şarê dıwele yew be yew şono keye. Nêmey şewe yew be yew sıtıl kenê xo dest u şonê dekenê zerrey dole.

Beno şewdır, padişa u sarê dıwele yenê verê dole. Fekê şarê dıwele şı bı pey goşan, zaf  bi şa. Vatêne, 'ma enê zulımkari ra qediyenê, ma enê finenime war.'

Padişa dole ser ra cıle wedarneno ke çı bıvêno: Eke zerrey dole pırr biyo, hama nême awka, nême zi şıto.

Padişa vano:

"Şıma çınayê, ez zi uyo.

Şıma dekbazi, şıma kami weçinenê, bıweçinên, peyniye tımi sey eniya.

Coke ra ez vındenan cayê xo de

Şıma zi vındenê zerrey enê sistemi de.