Cênıke Weşiye Serbestiye

Neşet Ertaş vano:

“Cênıke isana, ma ewladê a isanime!” 
Ewladê isani, isani rê nae nêkeno.

Cênıke rê zor u zerpe, tek teyna ebe hêrsê ẓü keşi niyo ya ki “sıṙê zeṙê çêyi” vaten’a ki isê xo ra viyarnaene niyo. No hem bext u meremetê welati de, hem vijdanê isanetine de nisano de beliyo.

Ewro cênıki, en cao ke serba yina cao de tibaro, çêa de, zuqaqa de, hurendia guri de, en zaf ki kesê ke yi tibarê xo be pê anê, yanê destê pi u bıray ra, destê waşti u bıraki ra, destê mêrdi ra, hatta hatta eke destê laci ra ênê kistene, heqeret vênenê. Hetê ra ki na welat de eke “Ṙoca cênıkan’a izrab u sıtami” dekerina, no tek teyna xoser ma rê ar u sermo.

Cênıka rê izrab u sıtam rewa diyaene, tek ẓü keşi ser estene fıkro de ẋeleto. No hem suc u qibetê qomio, hem ki karê şiasetio. Çıke no şiaset u politika ê ni çerx u duzenia. No çerx u duzeno ke ni izrab u sıtami rê rae keno ra, wertê qomi de, wertê camati de caê cênıke tıma peyê çêberi mınasıb vêneno, cênıke dustê ciamêrda de nêvêneno, cênıke qori nêkeno, serba weşiya ae tevdir nêcêno, o be xowo.

Canê cênıke mal u mılkê keşi niyo.
No can, ne edeb u sermi rê, ne dini rê, ne qanun u nızami rê, ne ki şiy u sıtara ciamêrda rê ca verdaene nêno.

Na fêl u emelê zorbaẓine, çenda u çend seṙio ke dest no fekê cênıka ser, peṙno ser ke veng mevecê, serm bıkerê, ṭamê dina ra destê xo boncê.

İşte na sevet rao ke cênıka rê izrab u sıtami ser ver veciyaene, lec kerdene karê raver u badoy niyo, karo de mecburiyo.

Derya Özcan
Tırki ra çarnais: Cemal Taş