Hamburger Domana Kişeno!

Êndi gelê tıxtor û diyetisyeni qebulkenê ke fast foodi insana tehdit kenê. Fast foodi waxto modernde kewti kulindanê dınya. İnsano modern bêwaxt bi, herçi ebe teqeze resnênê ta, werdena xorêki zaf waxt nêmendênê. Seba naera ki fast foodi icat bi; manê fast fooda uyo ke insan hama nıngaser çiyê erzeno ta û şono raa xora. Vırêndiye konseptê fast fooda zaf bereqiyênê. Herkesi cat kerdêne ke fast fooda buro. Fast foodi serê hardara bibi sembolê modernêni. Mc Donald's kamji welatde rabiyênê, verê çêveride mılet biyênê rêze ke zere kuyo.

Feqet dirê serara tepya herkesi di ke no sembolê de puço. O taw êndi nêweşiyê ke fast foodara bınge cênê ki vejiyay werte, şewlê fast fooda pıra pıra şayiya. Roja ewroênede êndi herkes zano ke fast foodi sembolê kapitalizmiyê. Ewro êndi eke welatê de dınyade protestoê bıbo, protestoci êrış benê caanê fast fooda ser. Wertê fast foodade en zaf hamburger êno rotene. Werdoğê hamburgeri zaferi ki doman û xortê. Feqet hamburger çıqa mırd kero hondê ki keno nêweş.

Zerarê hamburgeri zafêri reseno domana. Xora domanê nıkay ne mali çıraynenê ne ki tevera kaykene! Domani zaferi caê xode roniştê, ya atari kaykenê ya ki televzon sêrkenê. Na bêhereketêni xora ina kena xurt; eke hamburgera burê serhev benê qelew, bêhemd benê xurt.

Fast foodi, hem ebe çiyê zerê xo hem ebe qêydê potena xo hemı ki ebe ambalajanê xo gelê nêweşiya finê kar. Goştê hamburgera pırê hormona û antibiyotikawo; nonê hamburgera, seba ka rew kartû nêbo, pırê kimyasalano; cao ke hamburgera tede pojenê teqezera rınd pak nêbeno, ujo bakteri kunê kar; çawo ke hamburgera ebe tirijê mikro-pêla kenê germın, xêlê kimyasalê newê kunê kar. Nê ki pêro piya ebe werdena hamburgera derbazê ma benê. Welhasıl werdena hamburgera gelê nêweşiya silayi kena; riskê qanseri, alerji, xıtimiyayêna thamara, kolesterol, qelb, şekır, hêrsınêni, tansiyono berz. Hamburger têyna nino werdene, zafêtenê hamburgeri de kola û çiyo karbonatın şımenê; ebe o qêyde wucıdê xode kalsiyum kenê şenık, no kibeno sebebê nêweşiyanê astıka. Gorê nıvıstê psikologê de Amêrikanıjı, domanê ke şonê restorananê fast fooda, bêhemd benê şeytan, bêhewn manenê û hewnanê tersına vinenê. Gere domani werdena hamburgerara bışevekiyê.