Derya Özcane: Narina mı rê...

Narina mı, ewro mektevi bi ra, tu çentê xo, defterê xo guret? Qelema xo gurete?

Tu koti dera? Ewro mektevi bi ra, hurendia tu t‌‌̣ala, tu ki qe caê de nêasena, Narina mı, tu çıra çina? Şiya koti, çıra nina?

Zeṙê mı dezeno. Zeṙia mı ra çiyê vışiya, şi. Serde çün, terson. Tu koti dera, Narina mı?

Zaf dersê tu'yê gırani estê, emser. Emser mektevu de seveta mordemêni, seveta ṙındêni, seveta ṙındeḳêni, seveta haştiye, seveta haskerdişi derse danê wendene; gereke tu inu pêrüne bımusê. Eke mektev nêama, nêkuta dersu, pêrüne de sınıf de manena.

Çê to nêverda ke tu ewro bêrê mektev, dersu kuyê, çiyanê ṙındu bımusê. Taliyê tü'yo şia. Çê çê niyo, tu vana, cenemeo. Ne mae maa, ne pi piyo, ne aṗ aṗo, ne bıra bırao. Pêro pia bi ẓü, tu kerda t‌êser u t‌êbın ra.

To rê se kerd, ni cısnê yeẓidi? Çımê kamci zalım gınay çımanê tü'yê ṙındeḳu ro, destê kamci goneweri pıloşiya vılê tü'yo bari ro? Kami astıḳê tü'yê narini sıkıti? Kam kardi gurete, tu kardi kerda? Kam qemisê tu bi Narina mı? Mı heni inam kerd ke tu wesa wes veẓina, yena. Hama tu nêama, çiyo bin ama, vanê, na Narina.

Tu 'daê' vat, tu 'bao' vat? Tu berva, zırça, qe kes vengê tu nêheşiya pê. Çıra dina hetê to ra biye lal u k‌̣er‌̇e?  
Kam ke qemisê tu biyo, caê xo ceneme bo. Na dina de ṙoz mevino. 
Caê tu ki wertê gul u nuri de bo, Narina mı. 

#Narine
#Payiz
#Payiẓia Verêne

Derya Özcane

(Karikatür: Hicabi Demirci)